Arestado kag wala makaluwas ang 7 ka persona matapos ginsalakay sang Philippine Drug Enforcement Agency (PDEA) Capiz ang isa ka drug den sa Mckinley Street, Brgy I, Roxas City kagab-i sang Martes.
Ginkilala ang mga nagkaladakpan nga sanday Ema Villanueva, 43-anyos, caretaker sang balay kag tumandok sang Brgy IX, Roxas City apang temporaryo nga nagapuyo sa Brgy I; John Mark Dela Cruz, 36-anyos, residente sang Brgy. Calao, Dumangas, Iloilo; Irene Villasan, 42-anyos, drug den employee residente sang Brgy. Agbabadiang, Panitan, Capiz; Jalil Ompac, 27-anyos, residente sang Brgy IX; Kayma Polog, 38-anyos; Abdul Fatah Polog, 40-anyos lunsay sang residente sang Brgy. Tanque kag Alex Magbanua, 46-anyos, residente sang Brgy. I sining syudad.
Narekober sa posisyon sang mga suspetsado ang 9 ka sachets sang ginapatihan shabu, P500 mark money kag iban pa nga mga drug paraphernalia.
Ginabanta nga nagabalor tanan sang masobra P80,000 ang nakumpiskar nga iligal nga droga.
Sa karon, nakahunong na ang mga ini sa karsel kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002. | Judy Ann Juare