Dili mominos sa P1,088,000 nga balor sa gituohang shabu ang nasakmit sa mga sakop sa Philippine Drug Enforcement Agency (PDEA-7) ug Bureau of Jail Management and Penology (BJMP) sa ilang gihimong surpresa nga greyhound operation sa Cebu City Jail male dormitory.
Usa usab ka kalibre 45 nga pistola nga adunay mga bala ug magazine, mga cellular phones, ug ubang kontrabando ang nasakmit gikan sa sulod sa mga selda sa maong bilanggoan.
Matod ni Jail Warden Superintendent Jose Rusylvi Abueva nga dugay na sila nakamatikod sa mga kadudahang lihok sa mga binilanggo nga daw sa adunay iligal nga gihimo sa sulod ug nakadawat usab sila og report nga adunay mga kontrabando sa sulod hinungdan sa ilang pagpakigtambayayong sa PDEA 7 ug gihimo gilayon ang operasyon.
Nagtuo si Abueva nga gikan sa gawas ug gilabay ngadto sa sulod ang maong mga iligal nga butang bisan pa man nga aduna nay net nga gi butang sa ibabaw sa ilang koral.
Posible usab matud pa nga gibutang kini diha sa mga pagkaon nga dala sa mga dalaw ug wala na mamatikdi sa mga jail personnel gumikan usab sa kakapoy sa ubang personnel diin sila ra usab ang bantayan sa mga piniriso ug diha na molihok ang mga durugista nga maka sulod ang illegal nga drugas ug uban pa nga ginadili sa sulod sa City Jail.