DTI-GenSan nanawagan og dugang manufacturer sa oxygen

GIAWHAG sa labaw sa Department of Trade and Industry (DTI) sa GenSan ang mga negosyante sa mag-venture sa negosyong dunay kalabutan sa paggama og medical grade oxygen.

Kini dungan sa pagkasinati karon og kakulangon niini partikular na sa oxygen tungod sa padayong pagsaka sa kaso sa Covid-19. Matud ni Marvin Jinta, Officer Incharge (OIC) sa DTI-GenSan usa lang ang manufacturer sa oxygen sa tibuok rehiyon ug kini ang naa sa Barangay Glamang, Polomolok South Cotabato.

Usa pa sa rason sa pagkasinati og kakulangon sa supply nga miresulta sa pagsaka usab sa demand, mao ang pagka-delay sa raw materials sama sa liquid oxygen nga gikan pa sa Cagayan de Oro City.

Luyo niini, gibutyag ni Jinta nga wala silay nabantayan nga pagsaka sa presyo sa oxygen. Samtang, base sa impormasyon nila gikan sa mga retailers prayoridad nga mahatagan nila og supply ang mga ospital. Kahibaloan nga dungan sa pagsaka sa kaso sa Covid-19 ug pagsaka sa ihap sa severe ug critical cases misaka ang demand sa medical grade oxygen. ( Richel Gubalani)