Dugang 450 housing units, giapod-apod sa mga benepisyaryong Cebuano

“Sa panahaon karon, ilabi na kong dunay kalamidad pinakaimportante ang balay nga masilungan gumikan kini ang kahinanglan sa bisan unsa nga oras. Balay nga dekalidad pagkagama sama sa libreng kapuy-an nga atong giapod sa mga Yolanda survivors.”

Ang nasangpit nga pamayahag gibutyag ni Cabinet Secretary Karlo Nograles nga maoy nanguna sa pagpanghatag og dugang 450 housing unit nga gipahigayon via online sa Balay Bantayan Phase-2, Barangay Kabac, Bantayan, Cebu kagahapong adalawa sa pakigtambayayong sa National Housing Authority (NHA) ug lokal nga panggamhanan.

Malipayong gipamahayag ni Nograles, nga chairperson sa Inter-Agency Task Force for the Unified Implementation and Monitoring of Rehabilitation and Recovery Projects and Programs in Yolanda-affected Areas na “dunay katibuk-ang 5,971 nga mga pamilya ning rehiyon nga nakabaton og lig-on, hitsas, plastar ug labaw sa tanan libreng panimalay.”

Ang mga nasangpit nga panimalay nga gibutyag sa opisyal nahimutang sa mga munisipyo sa Region VII: Tabuelan, Cebu (220 units); Daanbantayan, Cebu (1,863 units); Bantayan, Cebu (900 units); Medellin, Cebu (631 units); Santa Fe, Bantayan Island, Cebu (1,000 units); Madridejos, Cebu (750 units); ug sa San Remigio, Cebu (607 units).

Gitataw ni Nograles nga maayo ang relasyon ngadto sa mga opisyal sa National Housing Authority at Local Government Units (LGUs) rason nga nahimong paspas ang implementasyon sa Yolanda Housing Program sa gobiyerno sa nagkadaiyang rehiyon ug probinsiya nga naapektuhan sa nasangpit nga bagyo.

“Nagapasalamat ko sa NHA sa pagpanguna ni General Manager Marcelo Escalada Jr. kauban si Regional Manager Jude Juntilo, lakip ang ubang opisyal sa NHA Region VII sa ilang gipakitang dedikasyon aron matapos gilayon ang ang pabahay. Gusto usab nako pasalamatan silang Sec. Michael Lloyd Dino sa Office of the Presidential Assistant for Visayas, Governor Gwen Garcia ug Mayor Arthur Depsi, lakip ang ubang personalidad sa Bantayan LGU sa ilang kooperasyon ug suporta aron mapatuman ang proyekto” sumala pa Cabinet Secretary.

“Kahinanglan nato nga magtinabangay. Gusto usab nato silang mahatagan og tsansa na subling makabangon ug mahaw-as sa kalisud, lakip ang kuyog niining suliran. Pinaagi niining community gardens na atong gimuntar sa mga Yolanda Housing sites, ang mga residente niini dunay makuhaan og sustansiyadong pagkaon ingon man posibleng kita sa matag-adlaw.”

Sa kabahin sa LGU, nagpasalamat usab si Mayor Depsi kay Pangulong Duterte, CabSec Nograles ug GM Escalada diin sumala niini “nga bisan kanus-a man wala nagduha-duha sa pagahatag  sa tanan namong kahinanglan alang sa ikalambo sa Bantayan. Espesyal  kini nga adlaw alang kanamo,  ilabi na sa mga benepisyaryong pamilya nga nakadawat og libreng balay. Makasugro kamo nga amo kining ipabiling plastar ug palambuon ang mga pasilidad niining bag-ong kumunidad.”