Dead on arrival nang nahidangat sa balay tambalanan ang duha ka menor de edad human nabanggaan ang ilang gisakyang single motor sa usa ka Nissan pick up ning milabayng adlaw sa hapon sa National Highway -Purok 8 Brgy Langkilaan, Trento Agusan del Sur.
Biktima giila nga sila Justin Menendez Hernandez, 17 anyos, lalaki, estudyante ug residente sa P-8, Brgy Langkilaan Trento Agusan del Sur samtang ang backrider niini nga si Hervic Menedez Fernandez, 16 anyos, lalaki, estudyante ug residente sa susamang lugar.
Samtang ang nakabangga sa gikaingong pick-up nga gimaneho ni Donald Laput Baylen, 60 anyos, minyo, mag-uuma ug residente sa Barangay 9 Lot 2, CDE Subdivision, Cabantian Davao City nga sakay mismo niini ang iyang asawa.
Sa gisay-say sa mga nakakita, ang maong pick-up paingon sa syudad sa Butuan apan pag abot sa lugar nga nahitabu-an kalit lamang nga mitabok ang single motor rason nga nabanggaan kini sa maong sakyanan. Matud pa, dali nga gidala gilayon sa balay tambalan ang duruha apan gideklara na kining patay sa attending physician. Sa pagkakaron kasamtangan nga naka kustodiya sa kapulisan ang driver sa pick-up ug mag atubang sa kaso aron manubag usab sa ngilngig nga panghitabo.
