Gipa-imbestigahan ni Police Regional Office(PRO 7) Director Brigadier General Anthony Aberin ang duha ka sakop sa Mobile Patrol Unit sa Cebu City Police Office (CCPO) nga nasakpang nangatulog na usab sulod sa patrol car samtang oras sa ilang duty ug nagviral sa social media.
Sa kuha sa video nga giingong nahitabo karung buwana, ang duha ka pulis nasakpan nga natulog sa patrol car nga nagparking sa usa ka pribadong building sa dakbayan sa Sugbo.
Dali usab nga gi-assigned ni CCPO Chief Colonel Ireneo Dalogdog ang maong mga pulis sa Cebu City Holding Admin Unit samtang nagpadayon ang imbestigasyon sa ilang administrative case. Diin lakip sa gi-imbestigahan mao ang hepe sa Mobile Patrol Unit ug ang ilang patrol supervisor.
Kahinumduman nga niadtong Abril, duha ka police personnel usab sa Abellana Police Station ang nangatulog sulod sa ilang patrol car samtang nag parking sa dalan General Maxilom.//