Nakabalik na sa ilang tagsa-tagsa ka panimalay ang anaa sa dul-an 200 ka mga Matinians nga unang nibakwit tungod sa nasinating pagbaha kagahapong adlawa nunot sa epekto sa Tropical Storm Crising.
Una niini anaa sa 157 ka residente gikan sa Barangay Matiao ang gipabakwit buntag kagahapon human gisulod na sa tubig baha ang ilang balay tungod sa pag-awas sa mga creek subay sa Mati City Disaster Risk Reduction Management Office.
Samtang sa Barangay Don Enrique Lopez, anaa sa 42 ka indibidwal o 12 ka pamilya ang gihikling ug gipasilong sa
Pagsilaan Elementary School apan hinay-hinay nga nibalik sa ilang mga balay.
Gawas sa mga namakwit natala usab sa CDRRMO ang pagdahili sa yuta sa Purok Daisy, Barangay Buso ug sa Sitio Biasong sa Barangay Don Salvador Lopez lakip na ang pagkatumba sa punuan ug mga sanga sa mga kahoy.
Usa ka balay sa Brgy. Matiao ang totally damaged human natumbahan og dakong punuan sa kahoy.
Sa karon padayon ang ginahimong clearing sa hiniusang pwersa sa Mati CDRRMO, kapulisan, kasundaluhan, City Traffic Management Office, City Engineering Office mga volunteers sama sa Braces, Kabalikat Civicom, Jaguar 10, ug Dreams 166.BNFM-DAVAO