SMALL scale ug sagad street level nga tigbaligya og gidiling droga, kini ang klasipikasyon sa rehiyon kalabut sa gidiling droga, base sa taho sa Philippine Drug Enforcement Agency (PDEA) 12.
Matud ni Aileen Lovitos, director sa PDEA-12 kini base na usab sa mga nasikop nila sa ilang mga gihimong operasyon.
Sagad usab moda sa transaksyon mao ang pagbaligya o ‘kaliwaan’ gamit ang online platforms. Pagdeliber usab gamit ang pribadong sakyanan, parcel, motels, inns ug mga drug den ginahimo ang paghatud, pagbayad ug paggamit sa gidiling droga.
Sa karon, gipakusgan nila ang ilang pagpanakop ug intelligence monitoring sa pakigtinabangay sa kapulisan ug uban pang law enforcement agencies batok sa maong iligal nga aktibidad. Nanawagan usab ang PDEA-12 sa mga partnership sama sa local government units, national government agencies ug katawhan aron mapadayon ang pag-ubos sa kaso sa gidiling droga.
Samtang, isip parte sa lakang kalabut sa demand reduction gipatuman nila ang Balay Silangan Reformation Program. Gikan 2018, naa sa siyam ka Balay Silangan Reformation Centers region wide, asa mokabat sa 232 ang migradwar.
Ang mga Balay Silangan ang naa sa Tupi in South Cotabato; Makilala sa Cotabato Province; Glan, Malungon ug Alabel sa Sarangani Province; Lutayan, Isulan, Kalamansig ug Senator Ninoy Aquino sa Sultan Kudarat Province. I Richel Gubalani