GIKLARO sa mga personahe sa South Cotabato II Electric Cooperative, Inc (SOCOTECO- II) sa Sangguniang Panlungsod (SP) ang rason sa brownout nga nasinatian sa pipila ka bahin sa GenSan.
Asa giklaro sa mga nasangpit nga wala’y kakulangon sa supply sa kuryente apan dunay problema sa distribution system nga rason sa brownout. Sa coffee shop, usa sa kinahanglan ang kuryente aron makahimo og kape nga order sa kostumer.
Hinungdan nga dako og epekto ang pagkawala sa kutay sa kuryente, butyag ni TJ Santos, tag-iya coffee shop. Sa konseho, gilatag ni Welson Dela Quadra, area operation officer sa distribution utility ang mga rason sa problema sa distribution system.
Pipila niini mao ang overloading sa ilang mga feeder o substations tungod sa kainit asa posibleng nagdungan nga migamit og electric fan ug aircon ang mga tawo. Lakip sa rason mao ang mga wildlife sama sa butiki, langgam, kwaknit og uban nga nakaepekto sa linya sa kuryente.
Nangayo usab og pagsabot si Dela Quadra sa mga konsumante nga naapektohan sa pagkapalong sa kutay sa kuryente. Giawhag niini ang katawhan nga moadto sa ilang website alang sa mga advisory sa brownout. I Richel Gubalani