Engkwentro, nagluntad sa Tapaz, Capiz; mga kagamitan sang gina-alegar CPP-NPA, narekober

Maswerte nga wala sang napilasan sa tropa 12th Infantry Battalion sang Philippine Army matapos nagluntad ang engkwentro sa mga gina-alegar katapo sang CPP-NPA terrorist (CNTs) sa Barangay Sta. Petronila, Tapaz, Capiz.

Suno sa impormasyon nagikan sa Philippine Army, nagluntad ang 5-ka minutos nga engkwentro matapos nakabaton ang tropa sang gobyerno sang tip nga nagapatigayon sang extortion activities ang terostista nga grupo sa nasambit nga lugar.

Sa clearing operation sang 12IB, narekober ang isa ka Magnum 357 Revolver; tatlo ka Anti-Personnel Mines (IED); duha ka Claymore Mines; isa ka time bomb; duha ka M16 short magazine; isa ka detonator switch; 50 metros sang wire; 23 rounds sang 5.56mm live ammunition; 24 M16 empty shell; anum ka 375 live ammunition; apat ka 357 empty shell; kag isa ka (1) Hammock.

Ginapahayag nga may napilasan sa terorista nga grupo base sa nakita nga tulo sang dugo sa dalan kun sa diin sila nagpalagyo.

Panawagan naman ni 3rd Infantry Division Commander, BGen. Marion Sison sa mga nabilin nga rebelde nga magsungka na kag magabalik sa sabak sang gobyerno kag mag-umpisa sang panibag-o nga kabuhi kaupod ang ila pamilya.//KMD Gicalde