Ex-Talitay, Maguindanao mayor, arestado sa police operation sa Batangas Port; suspek, patay matapos umanong manlaban

BATANGAS – Patay ang dating alkalde ng Talitay, Maguindanao na unang naaresto sa Batangas Port, Batangas City ngunit nanlaban umano sa kanyang police escort sa area ng San Juan City habang ibinabiyahe patungong Camp Crame kaninang umaga.

Kinilala ang suspek na si Montasser Sabal alyas ‘Sabal’ at ‘Montasir Sabal y Miling, 44 anyos, dating miyembro ng PNP-SAF at residente ng Talitay, Maguindanao.

Ayon sa report ng CIDG NCR, ang suspek ay sakay sa puting van na lulan ng MV Reyna De Luna 4 kasama ang iba pa nang maaresto ng operatiba ng CIDG NCR, Batangas CIDG, PDEG at PNP sa Batangas Port bandang 7:00 kagabi.  

Ang mga naaresto naman nitong kasama sa sasakyan ay kinilalang sina Norayda Nandang y Makmud, 43; Muhaliden Mukaram y Samal, 36 anyos at Aika de Asis y Meler, 34 anyos.

Narekober mula sa mga ito ang isang M16 A4 Colt AR 15, isang magasin ng M16 A4, anim na bala ng M16 A4, Glock 23 9MM, apat na magasin ng Glock 23 9MM, 44 na bala ng Glock 23 9MM, isang fragmentation grenade, dalawang plaka, limang cellphone, dalawang kutsilyo, ilang dokumento at perang nagkakahalaga ng 48,840 pesos.

Narekober rin ang dalawang heat sealed plastic sachets na naglalaman ng pinaniniwalaang Shabu na tumitimbang sa 23.9844 grams at 4.4388 grams at tinatayang nasa 200,000.00 ang halaga.

Samantala, sa hot follow up operation ay nahuli rin ng mga awtoridad ang iba pang kasama ni Sabal na kinilalang sina Ailyn Compania y Guiadel, 45; Zuharto Monico y Abdul, 28 at Wilson Santos y Basir, 41.

Sa isinagawang press briefing ni PNP chief Gen. Guillermo Eleazar, sinabi nitong nanlaban umano si Sabal sa kanyang police escort sa area ng San Juan City habang binabiyahe patungong Camp Crame kaninang 5:20 ng kaninang umaga.

Inagaw umano nito ang armas ng kanyang escort na nauwi sa agawan ng armas.

Wala umanong magawa ang pulis kundi barilin si Sabal dahilan para magtamo ito ng tama ng bala sa katawan.

Dinala pa ito sa San Juan Medical Center ngunit binawian rin ng buhay pasado 6:00 kaninang umaga.

Base sa datus ng PNP, si Sabal ay dating PNP-SAF member noong 1998-2010 at kabilang sa listahan ng national watchlist on drugs.

Siya rin umano ay kabilang sa mga may kagagawan at utak sa nangyaring Davao City bombing noong September 2016.

Full time supporter at supplier din umano si Sabal ng mga armas ng Bangsamoro Islamic Freedom Fighters o BIFF.

Leave a Reply

Your email address will not be published. Required fields are marked *