LEGAZPI CITY – Nagin matrayumpo an aktibidad kan Naval Forces Southern Luzon (NAVFORSOL) kasarabay kaini an 9 na navy ship para sa Exercise Sama-sama 2023 sa syudad kan Legazpi.
Pinangenotan ini ni Commodore Joe Anthony Orbe kan NAVFORSOL asin yaon man an Guest Speaker na si CDR Jun Chen, Foreign Area Officer, Destroyer Squadron Seven asin Lt. Gen. Efren Baluyot kan Philippine Army, Commander , South Luzon Command.
Segun kay Orbe, taun-taon man ini pigkokondusir sa manlaen-laen na lugar siring kan Cebu, Palawan asin iba pa.
Napili man an huli ta saro an probinsya an sa mga disaster-prone na lugar asin nasakto man na naikondusir an aktibidad sa tahaw kan pag-alburoto kan Bulkang Mayon na presenteng nasa alert level 3 status.
Nagkapira sa mga aktibidad sa Exercise Sama-sama iyo an pagtutukdo dapit sa disasters response asin dakol pang iba. Saro ining bilateral exercise sa pagultanan kan United States Navy asin Philippine Navy na obhetong pakusugon an international defense cooperation asin ibusol an rules-based international order.