Gibutyag sa Federated President sa Fish Vendor Association nga si Gomer Esic, ang mga reklamo sa mga negosyante sa sulod sa merkado ning dakbayan sa Oroquieta, sa programang Tira Brigada kagahapong adlawa.
Matud pa, niini nga nag-antos ang mga negosyante sa pagpangutang og salapi para ibayad sa buwis, aron mosunod sa balaod nga gipatuman sa kagamhanang lokal, apan nagmulo ang manindahay gumikan sa hinay nga halin sa ilang paninda, tungod sa mga naninda sa mga kadalanan sa dakbayan.
Dungag pa, nga misunod sila sa health protocols, bisan kon kini ang hinungdan sa pagka-hasol sa mga indibidwal nga mo sulod og gawas sa Mercado Publiko, apan wala kini nila igsapayan.
Nakita sa usab nila nga wala nagpatuman ug social distancing ang mga naninda sa gawas, hinungdan nga nanggawas usab sila para walay na buwis nga bayaran, kay sumala pa wala man diay badlungan ang mga namaligya sa kadalanan nga halos gisupak ang tanang kamanduan.
Nagbahad ang mga negosyante, nga kung dili maaksyonan sa mga opisyales ang ilahang dugay mulo ug reklamo, hangtod sa hangtod usab silang mamaligya sa gawas og dili na gayod mo bayad sa buwis.
Malaumon ang pipila sa pasalig sa Head sa SOCD, nga si Archie Ajias, nga ang tanang kabarangayan nga adunay mga namaligya og isda, ila kining badlungon, ingon man pasudlon sa Mercado Publiko. (Sam Tizon)