Naglab-ot na sa masobra P128 milyon ang financial assistance nga napanagtag sang administrasyon ni Governor Fredenil Castro makaligad ang isa ka tuig sini nga pagpanerbisyo bilang ika- 23 nga gobernador sang probinsya sang Capiz.
Sumugod sang nagpungko ini sa pwesto, nakit-an kag nabatyagan sang Capisnon ang matuod nga paghigugma sang isa ka amay sang probinsya.
Isa sa gintutukan kag ginhatagan prayoridad sang bag-o nga gobernador ang mabuligan ang pumuluyo pinaagi sa Medical, Hospital kag Burial Assistance subong man sa Shelter kag Transportation Assistance agud nga mapahagan-hagan ang palaligban sang mga nagakinahanglan sini.
Suno sa datos sang Provincial Social and Development Office (PSWDO), sa nahauna nga tuig sang administrasyon ni Gov. Castro kapin sa P128,612,365.28 sa kabug-usan ang nahatag nga ayuda sa 21,976 nga mga nagdangop nga Capisnon sa gobyerno probinsyal.
Sa nasambit nga kantidad ang P36, 606,665.28 dire ang nakadto sa Hospital Assistance, sa Burial Assistance naman ang 47,699,600, Medical Assistance- P44,169,100, Shelter Assistance- P133,000 kag P4000 naman ang nahatag sa Transportation Assistance.
Sa karon, nagapadayon ang serbisyo nga may yuhom kag balatyagon ni Governor Castro kag gobyerno probinsyal.
Ginahimakasan sini nga mamentinar kag mas mapasangkad pa ini nga programa para sa pagbulig sa mga nagakinahanglan. | Judy Ann Juare