UBAY ubay nga mga aktibidad ang giandam sa Bureau of Fire Protection kun BFP-GenSan alayun sa Fire Prevention Month nga gina obserba kada bulan sa Marso.
Segun ni SFO2 Randy Gulle, focal person sa Bureau of Fire Protection kun BFP-GenSan ang unang adlaw sa Marso gisugdan sa opening program sa ilang buhatan ug gisundan sa motorcade dungan sa pagpatingog sa siren aron mapahibalo sa katawhan ang pagsugod sa fire prevention.
Ang mga aktibidad gilangkuban sa fire drill, fire fighting services,fire prevention services, medical services ug uban pa.
Ang tema karong tuiga sa Fire Prevention Month mao ang “Sa Pag-iwas Sa Sunog, Hindi Ka Nag-iisa” hinungdan nga tanan matud pa ang angayang makiglambigit aron mapugngan ang sunog.
Alayun niini gipasalig ni Gulle nga nakaandam kanunay ang ilang mga firetruck ug suportado sa ubang mga organisasyon ug sa barangay sa syudad nga adunay kaugalingong mga firetruck.
Samtang gipanghinaut niini nga makabaton og penetrator truck ug ladder fire truck ang BFP-GenSan aron magamit sa mga tag-as nga building sa pagpalong sa kalayo.