SUBLING gibawal sa GenSan ang pagpasulod sa poultry products dungan sa pagkatala sa bird flu case sa silinga’ng lugar. Matud ni Dr. Emilio Gargaran, City Veterinary Officer, ipatuman sa mga gimuntar nga animal quarantine checkpoints ang ‘no permit no entry.
Setyembre 19 ang pagpositibo sa bird flu sa pipila ka manok sa usa ka poultry farm sa Barangay Magon, Tantangan, South Cotabato. Nasuta nga positibo sa virus ang mga manok, human gipailawom sa culling ang 100,000 manok asa pipila ka samples ang nagpositibo virus.
Dugang ni Gargaran, gihugtan na nila ang pagpatuman sa regulasyon sa pagbiyahe ug shipment sa manok ug poultry product sa siyudad. Sa GenSan ug probinsiya sa South Cotabato makita ang daghang poultry farms, usa sa ‘major’ source sa dressed chickens sa Mindanao.
Ang siyudad ang naga-produce og average milyon dressed chicken matag semana, rason nga kinahanglan protektahan, asoy sa opisyal. Ang GenSan, duna na’y gipagula nga Executive Order (EO) no.12 series of 2022 kalabut sa pagpatuman sa regulasyon batok bird flu.
Giklaro ni Gargaran, wala’y labot sa regulasyon ang mga lugar nga wala’y kaso sa bird flu apan kinahanglan mag-comply sa listahan sa rekisitos ilawom sa executive order. I Richel Gubalani