GenSan lakip sa ‘Plus 10’ area sa prayoridad sa Covid19 vaxx, distribusyon

GILAKIP na sa nasyunal nga gobyerno ang GenSan isip prayoridad nga lugar nasud alang sa Covid-19 vaccine distribution. Dungan sa padayong pagpasaka sa kaso sa virus gikan pa atong Mayo ug midoble ang ihap sa natala karong bulan sa Hunyo.

Matud ni Harry Roque, tigpamaba sa Malakanyang sa usa ka press briefing Huwebes sa buntag. Lakip ang GenSan sa gitawag nga ‘Plus 10’ areas tungod sa nasinatiang pagsaka sa kaso sa Covid-19. Usa sa nahimong basehan sa pagbutang sa prayoridad sa GenSan mao ang pagkonsidera isip highly urbanized ug dense environment lakip ang pag-ila sa kontribusyon sa regional ug national economy.

Kauban sa GenSan sa Plus 10 areas mao ang Bacolod, Iloilo, Cagayan de Oro, Baguio, Zamboanga, Dumaguete, Tuguegarao, Naga ug Legaspi. Sa ulahing datus sa City Health Office (CHO) as of June 23, 2021 nabakunahan na ang 23,729 katao nga lakip sa priority group. Sama sa frontline medical health care workers, seniors citizens ug adult with comorbidities ug gamit ang AstraZeneca ug Sinovac vaccine. Sa karon, gawas sa dugang 5,000 vials sa Sinovac nga gideliber Huwebes sa buntag duna pay 1,200 vials sa maong bakuna ang naa sa CHO.