SAYO pa aron ma-identify ang suspek sa ulahing insidente sa pagpamusil sa usa ka trisikel asa naangin pa ang usa ka 4-anyos nga batang babaye sa Fil-Am road, Purok 24, Barangay Fatima, Pebrero 17.
Segun kang PCol. Jomar Alexis Yap, labaw sa General Santos City Police Office nga gipaniguro niini sa iyang mga chief of police nga ang kaso nga ipasaka sa unsa mang kaso sa pagpamusil ang airtight ug madawat sa korte.
Gani giangkon niini nga dili basta basta ang pagpahigayon og imbestigasyon labi pa nga ang pamilya ang dili pa maistorya tungod anaa pa sa pagpangasubo.
Siguraduhon matud pa nga matudlo gayud ang tinuod nga suspek ug mapasakaan og kaso aron mahatag ang hustisya sa biktima.
Kinahanglan usab niini mahuptan ang tanang dokumento ug impormasyon aron matandi sa report kung tama o dili aron dili masayang ang imbestigasyon.
Gani giangkon ni Yap nga bisan hinay matud pa ang dagan sa imbestigasyon basta sigurado lang nga lig-on ug walay buslot aron gayud mailhan ang mihimo sa krimen.