Boluntaryo nga nagsungka sa Calinog Municipal Police Station ang 12 tanan ka mga ginaalegar ‘Supporters’ sang New People’s Army (NPA) nga lunsay mga residente sang Barangay Buri, Tapaz, Capiz.
Sandig sa impormasyon nga nakuha sang Brigada News FM Roxas City sa Calinog PNP, sa 12 ka mga nagsungka, 8 diri ang mga kalalakihan kag apat ang mga babayi.
Gin-athag man sang kapulisan nga indi sila rebelde kundi may koneksyon lamang sila sa Communist Terrorist Group sa idalom sang Central Front, Komiteng Rehiyon-Panay.
Ginapahayag nga nagsungka ang mga ini bangud luyag nila nga magbalik sa sabak sang gobyerno kag untatan na ang pagsuporta sa mga rebelde.
Base sa ila pagsaysay sa mga kapulisam, sila ang ginasugo sang rebelde nga magbakal sang pagkaon kag mga gamit sa banwa kag sila man anay ang naga-serbe nga dulunggan kag mata sang New People’s Army sa ila nga barangay kag kun ano ang mga aktibidades sang gobyerno.
Mahibaluan nga malapit ang Barangay Buri sa Calinog rason nga didto sila nagsungka.
Sa karon, ginhilway na sang Calinog PNP ang mga ini kag nagpalauli na sa ila tagsa ka mga panimalay. | Judy Ann Juare