Ginkumpirmar ni Kapitan Leny Dullano, sang Brgy. Tabuc, Pontevedra, Capiz nga napatay na ang ginaalegar gunman nga nagluthang patay sa iya anak nga si anay ABC President Frederick “Dekoy” Dullano.
Suno kay Kapitan Leny, nakabaton siya sang impormasyon nga gin-atake sang balatian nga hapo ang suspek nga si Renante Banate sa Lemery, Iloilo. Dugang pa sini, nalipay siya nga napatay na ang ginatudlo nga suspek apang nasubuan man ini bangud wala gid nasugid sang suspek kun sino ang utok sa pagpapatay sa iya nga bata.
Matandaan, sadtong Hulyo 7, 2022, ginluthang sang riding in tandem si “Dekoy” Dullano sa atubangan mismo sang ila balay kun sa diin si Renante Banate ang ginatudlo sang kapulisan nga nagpangamot sa pagpatay kag si Gelbert Bacong Berte ang nagserbi nga driver sang motorsiklo. Sadtong Octobre 22, 2022 nadakpan sang mga otoridad si Berte pinaagi sa gahom sang warrant of arrest sa kaso nga murder kag sa karon nagapabilin ini sa prisohan. | Judy Ann Juare