Nagdangop sa istasyon sang Brigada News FM Roxas City ang isa ka Ginang matapos ginaalegar na scam sang isa ka realty corporation nga nagtanyag sa iya nga magbakal sang duta.
Ang wala na ginhingadlan nga biktima ang residente sang Roxas City.
Sandig sa iya panaysayon, may isa ka ahente nga ginkilala kay Lindalyn Sagaya sang Chosenland Realty Corporation ang nag-recruit sa iya nga magbakal sang duta sa may bahin sang Lawaan heights kun sa diin nakakuha siya sang 83 square meters kag iya na ginahulog-hulogan kada bulan sang P3,200 para sa lima katuig.
Suno diri, nakabayad siya sang iya bulanan humalin 2012 tubtob 2015 kag sang yara na sa tunga-tunga sang bayranay iya nalang ginkakibot nga nagsarado na ang opisina sang nasambit nga realty sa Daliva Bldg, 4th floor, Mckinley St. Roxas City sang napatay ang head sini nga si Leopoldo Clavero.
Nahibaluan nga nagdangat sa P137,000 ang iya nabayad sa amo nga realty corporation.
Dugang pa sini, madamo sila ang nagkuha sang duta kag nagabayad sang bulanan, gani ila ginakatingalahan nga wala man lang sila ginpatawag agud pahibaluon sang estado sang ila ginabakal nga duta matapos nga nagtaliwan si Clavero kag tubtob subong wala na sila sang contact sa pamilya sini kag sa tag-iya mismo sang duta nga si Irah Franco nga nagapuyo sa Taguig City.
Ulihi man natalupangdan sang ginang nga Provisionary Receipt ang yara nakabutang sa resibo sang iya payment sa baylo nga Official Receipt dapat.
Luyag sini nga mabawi ang iya binayad bangud indi man nila matandog ang duta kay wala sila sang ginahawiran nga titulo.
Nagapanawagan ini sa publiko nga kun sin-o man ang nabiktima sang Chosenland realty corporation ang maguwa na ukon magpalista agud makahimo sang kawsa kun ano ang mga dapat himuon agud nga ila mabawi ang kwarta nga ila ginpangabudlayan. | Judy Ann Juare