GIBUNGKAG sa anti- narcotic group sa GenSan ang gituohang drug den sa KPS Zone 1, Barangay Labangal alas-8:25 sa gabii, Miyerkoles.
Sa taho gikan sa Philippines Drug Enforcement Agency (Pdea) 12 nasikop nila sa operasyon ang magkapuyo ug tulo ka babaye nga mibisita sa drug den.
Gisulod nila ang balay nga gipanag-iyahan sa pagkapuyo nga silang Joy Regenio, 35-anyos ug Joel Bagat, 48 bitbit ang search warrant gikan sa korte ug didto nila nakita ang duha lakip silang Lovely Villegas, 21-anyos, entertainer, Gelyn Mongkil 27, entertainer ug Marlyn Dela Cruz, 21- anyos, nagpuyo sa dakbayan nga mibisita aron mogamit og iligal nga droga.
Narekober sa gidudahang drug den ang duha ka putos sa gituohang shabu nga dunay ginbug-aton nga unom ka gramo ug nagkantidad og naa sa P40,800.00, lighters, aluminum foil strips, bamboo sealer ug uban nga drug paraphernalias.
Si Regenio ang nasikop na sa kapulisan tungod sa samang sulod ug napreso gikan Enero 2017 hangtud Pebrero 2019. Mibalik sumala pa sa illegal drug trade sa mga unang bulan aning tuiga.
Kasong pagsupak sa Section 6, 7, 11 ug 12, Article II sa Republic Act 9165 o Comprehensive Dangerous Drugs Act of 2002 ang gipasaka sa mga otoridad batok sa mga dinakpan. ( Richel Gubalani)