Magatulak karon sa hapon, Nobyembre 5 pa-Manila kag magadiretso padulong sa syudad sang Darwin, sa Northern Territory, pungsod Australia si Governor Eugenio Jose Lacson.
Ginpahayag ni Provincial Administrator Atty. Rayfrando Diaz II ang pagpadulong ni Governor Lacson sa Australia ang para sa isa ka official business upod sa mga opisyales sang Darwin kag sa mga tiglawas may angut sa job placement kag training program sang mga Negrenses sa amo nga pungsod.
Ang gobernador upod sang iya sini nga team halin sa gobyerno probinsyal maga-courtesy call sa Mayor sang Darwin nga si Konstantine Vatskalis kag mga pinuno sang mga nagkalain-lain nga mga departamento kaangay sang turismo, edukasyon, disaster preparedness kag iban pa nga mga bagay.
Dugang pa ni Diaz kahigayunan man para sa gobernador hibalu-an ang kahimtangan sang pagpangabuhi sang mga working students nga taga- Negros Occidental sa nasambit nga syudad.
Magalawig sang isa ka semana ang pagbisita sang gobernador sa Darwin City kag magabalik ini siya sa probinsya sa maabot nga Nobyembre 12.
Bangud sini, gindesignar nga mangin Acting Governor si Vice-Governor Jeffrey Ferrer, kag ang mangin acting Vice Governor amo si Board Member Manuel Frederick Ko.
Mangin kaupod sang gobernador kanday Provincial Administrator Atty. Rayfrando Diaz II, NOLTC ukon Negros Occidental Laguage and Information Technology Center Vocational School Administrator Ma. Cristina Orbecido, Negros Occidental Scholarship Program Division head Karen Dinsay, Provincial Tourism Officer Cheryl Decena, DRRM representative Project Development Officer 1 Irene Bel Ploteña kag Provincial Information Officer Charina Magallanes-Tan.