Governor Padilla naniniwalang kayang ipagpatuloy ang No Balance Billing policy sa mga pampublikong ospital sa lalawigan sa mga susunod na taon

CAMARINES NORTE- Naniniwala si Governor Ricarte “Dong” Padilla na kayang ipagpatuloy ang No Balance Billing Policy na ipinapatupad ngayon sa mga pampublikong ospital sa lalawigan ng Camarines Norte.

Simula umano nang siya may maupo sa pwesto noong Hunyo 30, 2022 ay sinimulan ang polisiya para sa lahat ng pasyente na dinadala sa Camarines Norte Provincial Hospital, Labo District Hospital at Capalonga Medicare Community Hospital.

Gayunman ang malaking katanungan pa rin umano sa ngayon ay kung paano ito ma- sustain sa susunod pang dalawang taon o hanggang 2025 sa pagtatapos ng kaniyang termino

Sa isinagawang Health Summit nitong Biyernes, March 4, sinabi ni Padilla na ngayon ay nakikita na niya ang liwanag na posibleng ma- sustain talaga ang no balance billing policy sa tulong ng Philippine Health Insurance Corporation.

Dinaluhan ang Health summit ng mga Alkalde, Municipal Health Officers, Municipal Budget Officers, Municipal Planning Officers, Sangguniang Bayan Committee on Health, Department of Health at ng mga kinatawan mula sa mga pampubliko at pribadong ospital.

Umapela ang Gobernador sa lahat nang dumalo sa summit na magtulong- tulong para matugunan ang problema lalo na ng mga mahihirap para magkaroon ng access sa maayos at affordable healthcare.

Sa pamamagitan umano ng pagtutulungan ng Provincial Government, Philhealth at DOH ay pwedeng maranasan din ng mga mahihirap ang gamutang nararanasan lang ng mga mayayaman.

Leave a Reply

Your email address will not be published. Required fields are marked *