Grade 11 student, pilason matapos ginbuno sa banwa sang Pontevedra

Pilason ang isa ka grade 11 student matapos ginbuno samtang nagasakay sa motorsiklo sa Brgy. Ilawod, Pontevedra, Capiz takna alas 2:30 kaina sang kaaganhon.

Ginkilala ang biktima kay Mark Arjay Acuyong, 20-anyos kag residente sang Brgy. Banica, Roxas City.

Samtang ang suspek amo si Alyas Bersabal Contreras, residente sang Brgy. Tabuc, sa nasambit nga banwa.

Sandig sa inisyal nga imbestigasyon sang Pontevedra Municipal Police Station, samtang nagasakay ang biktima sa motorsiklo nga ginamaneho sang iya abyan nga si Nash Alcazaren padulong kun tani sa balay sang isa pa nila ka abyan, hinali nalang ini nga ginbuno sang suspek sa nawala nga porsyon sang iya likod.

Nahibaluan nga antes paman ang natabo nga pagpangbuno may yara na sang nagluntad nga komosyon sa duha ka grupo sang biktima kag suspek sa street party sadtong nakaligad nga fiesta sa amo nga banwa.

Ginpadangat sa Bailan District Hospital si Acuyong para sa nagakaigo nga pagbulong.

Madasig naman nga nagpalagyo si Contreras matapos ang ginkumiter nga krimen.

Sa karon, padayon pa ang imbestigasyon sang kapulisan sa nasambit nga insidente. | Judy Ann Juare