Grade 7 student sa Illinois, gumawa ng ventilator gamit ang laruang “Lego” para sa mga COVID-19 patients

WINNETKA, ILLINOIS—Isang henyong maituturing ang naging imbensiyon ng Grade 7 student at 12-anyos na si Anthony Hartman matapos siyang gumawa ng ventilator para sa mga COVID-19 patients gamit lamang ang laruang “Lego”.

Ayon kay Hartman, noon pa man ay mahilig na siyang mag imbento at magbutingting ng mga bagay-bagay simula nang siya ay magka isip.

Naisipan niyang gawin ang naturang imbensiyon matapos na mabalitaan ang shortage o kakulangan ng mga ventilators sa kanilang lugar dahil sa dami ng mga tinatamaan ng COVID-19.

Nalaman niya rin ang paggawa ng ilang mga unibersidad ng mura at abot kayang respirator units kaya’t ninais niyang gumawa ng sariling bersiyon nito “with a twist” kaya gumamit siya ng laruang Lego.

Inabot ng ilang linggo si Hartman para tapusin ang kanyang imbensiyon at nang mabuo niya ito ay kanya itong tinawag na “EVentilator2020.”

Sa ngayon, balak ng batang henyo na isumite ang kanyang imbensiyon sa LEGO upang maikalat ang kanyang bersiyon ng ventilator nang sa gayon ay makatulong sa mga pagamutan sa liblib na lugar na nakakaranas ng kakulangan ng suplay ng ventilators ngayong nagpapatuloy pa rin ang pandemya. | JUMEL DELA ROSA

Leave a Reply

Your email address will not be published. Required fields are marked *