Isa ka ginaalegar granada ang nakit-an sang mga kabataan nga nagapamunit sa fish pond sa Brgy. Barra, Roxas City takna alas 11:00 sang udto kahapon nga adlaw sang Dominggo, Agosto 13.
Suno sa wala na ginhingadlan nga 11-anyos nga bata nga lalaki, magapamunit kuntani sila sang iya mga kaupod sang ila nakita ang amo nga explosive device sa kilid sang fish pond.
Dugang pa sini nga wala nila ini gintandog sa baylo ila ini ginpahibalo sa barangay.
Madasig naman nga gin-report ni Barangay Kapitan Ernie Borreros sa mga kapulisan kag diri nadiskubrehan nga isa ka hand grenade fragmentation ang nakit-an sa mga kabataan.
Nahibaluan nga ang fish pond ang isa anay ka dump site area. Sa karon, yara na sa paghinakop sang mga otoridad ang nasambit nga granada para sa nagakaigo nga disposisyon. | Judy Ann Juare