Health authorities sa GenSan, alerto vs pagsaka sa Covid-19

ALERTO ang health authorities sa GenSan batok sa posibleng subli nga pagsaka sa kaso sa corona virus disease Covid-19.

Miapela kini sa publiko nga padayong mosunod sa gipatumang minimum health protocols batok sa virus. Pagsuot og face mask ug uban pang minimum health protocols ang angayang sundon sa tanan aron malikaya’ng matakboyan sa sakit.

Matud ni Dr Lalaine Calonzo, labaw sa City Health Office (CHO) mandatory ang pagsul-ob og face mask sa mga senior citizens ug dunay comorbidities luyo sa pagkonsidera sa siyudad nga naa sa low risk sa Covid-19. Isip senior citizen, nagtuo si Louisa Vista, 83-anyos, naga-serve sa simbahan nga mahinungdanon ang pagpabiling pagsuot niini, pagmintina sa physical distancing ug pagpanglimpyo aron dili matakboyan sa virus.

Pag-obserba ni Calonzo, daghan tungod sa duha katuig nga pandemya daghan sa taga-gensan ang naanad na sa pagsuot og face mask. Sa karon, naa lang sa 28 ang active Covid-19 cases ang natala sa gensan. 2022 unang kwarter, ulahing natala sa Gensan ang taas nga kaso sa virus o surge atol sa pagtumaw sa Omicron sub-variant.

Kini ang rason sa pagpangandam sa siyudad sa posibleng pagsaka sa kaso sa virus dungan sa pagkatala sa kaso sa mga bag-ong Covid-19 strain ug diriyot nga pagsaka sa kaso sa virus sa kasigbit nga rehiyon. I Richel Gubalani