Health Authorities sa Region-7 suportado ang dili paggamit ug Face shields

Gipaboran sa mga Health authorities sa Central Visayas ang bag-ong derektiba ni Presidente Rodrigo Duterte nga dili na kinahanglang magsul-ob og face shield ang mga tawo.

Gipadayag sab sa mga opisyales Department of Health (DOH)-7 ang kaandam sa rehiyon sa pagsunod sa derektiba sa Presidente.

Nasayran nga giaprobahan na ni Presidente Duterte ang rekomendasyon sa Technical Advisory Group nga limitahan nalang ang paggamit og face shield ngadto sa mga lugar nga adunay daghang taw ug sa mga siradong lugar nga hinay og ventilation.

Apan matud ni Dr. Eugenia Mercedes Cañal, pangu sa DOH-7 Regional Epidemiology and Surveillance Unit, nga ila pang gihuwat ang derektiba sa central office alang sa implementasyon sa maong lagda.

Subli sab niyang gitin-aw sa buhatan nga wala pay pagtuon nga nagpamatuod nga makatabang sa pagpaminos sa pagkatap sa virus ang pagsul-ob og face shield.