Ginkunfirmar ni Negros Occidental Provincial Administrator Rayfrando Diaz II indi kalakip ang mga healthcare workers sang probinsya sa mga medical frontliners nga miembro sang MFLAN ukon Medical Frontliners Alliance of Negros nga nagapaandam sang mass resignation may kaangtanan sa kapaslawan sang gobyerno nasyonal kag sang Department of Health masabat ang ila sini panawagan sa pag-release sang ila special risk, meal kag transportation allowances.
Sandig kay Diaz wala siya sang may na-monitor nga plano sa bahin sang mga healthcare workers nga nagatrabaho sa mga hospital nga ginapadalagan sang gobyerno probinsyal angut sa nasambit nga tikang kag ang ginatumod diri nga mga healthworkers ang yara sa idalom sang pagdumala sang DOH.
Ginpahayag dugang ni Diaz tanan nga mga benefisyo para sa mga medical frontliners, healthcare workers sang probinsya ang ginahatag gid sa ila kaangay sang hazard pay, laundry kag madamo ka iban pa.
Sa nahibaluan pila ka mga miembro sang MFLAN magamartsa sa mga mayor nga dalanon sa syudad sang Bacolod sa palaabuton nga Septyembre 21 agud ipakita ang ila sini nga pagka-dismaya sa indi pag-release sang ila benefisyo.