-Reymund Titong
KABANKALAN CITY, Negros Occidental — Gin-reactivate ukon gin-lunsyar sang syudad sang Himamaylan ang ila Barangay Bantay Peste Brigade batuk sa mga fall armyworm ukon tagustos nga gina-atake ang ektaryas nga kamaisan kag katubohan sa syudad.
Mismo ang Association of Barangay Captains (ABC) kag City Agriculture Office (CAO) ang nag reactivate sang anti-pest program. Sa karun, ang third kag fourth quarter Crop Protection Program nga budget ang ginagamit sang syudad para sa pag kontrol sang armyworm.
Suno kay Himamaylan mayor Rogelio Raymund Tongson, gina-padasig pa gid sang syudad ang mga tikang sini batok sa peste, agud indi na magdamo ang possible ma-apektuhan nga kaumhan. Plano man sini nga magbakal sang binhi sang mais para mahatag sa lubos nga na-apektuhan sang infestation sa syudad.
Naka-coordinate naman sila sa Office of the Provincial Agriculturist (OPA), para sa massive spraying sa mga lubos nga naapektuhan nga mga barangay nga gamit ang isa ka drone.
As of June 21 nga datus nga gin-balhag ni Nilo Basco, Jr., Crop Protection Section Head sang OPA, 112.54 na ka ektaryas sang kamaisan kag katubuhan ang na-apektuhan sang pag pang-ataki sang armyworm sa Himamaylan.*