Pormal na nga gin-install bilang ika-apat nga Arsobispo sang Capiz si His Excellency The Most Rev. Victor B. Bendico, D.D. nga gintambungan naman sang ginatos ka kaparian kag tumulu-o nga ginpatigayon sa Immaculate Concepcion Metropolitan Cathedral.
Ginpangunahan ni Apostolic Nuncio to the Philippines Most. Rev. Charles John Brown, ang nasambit nga installation.
Naghatag man sang iya mensahe ang ika-tatlo nga Arsobispo sang Capiz kag sa karon Arsobispo na sang Archdiocese sang Manila nga si His Eminence Jose Cardinal Advincula Jr., D.D. kag Archbishop-Emeritus of Cotabato, His Eminence Orlando B. Cardinal Quevedo.
Nagpadulong man ang mga kaparian gikan sa Archdiocese of Baguio nga amo ang ginhalinan ni Bendico; magluwas pa sa kapin 30 ka mga Obispo gikan sa magkatuhay nga lugar; kapin 130 ka mga kaparian sa Capiz; kag mga representante gikan sa kinatuhay nga mission stations/parokya sa probinsiya.
Sa iya nga mensahe, nagbilin sang pangabay si Bendico sa tumulu-ong katilingban sa probinsiya nga pahanugutan siya nga mangin amay, utod, kag ila nga abyan bilang bag-o nga arsobispo sang probinsiya.
Matandaan nga si Bendico ang sadto anay nagserbi bilang Rector sang Immaculate Concepcion Metropolitan Cathedral antes ginsaylo sa Archdiocese sang Baguio kun sa diin naglawig siya sang 6 ka tuig.