House, inaprubahan ang health stockpiling bill sa 2nd reading

Inaprubahan ng House of Representatives sa 2nd reading ang House Bill 9456 o ang proposed Health Procurement and Stockpiling Act.

Ito ay matapos isalang ang panukala sa botohang ayes at nays sa plenary session kagabi.

Ipinaliwanag ni House Committee on Health Chair, Quezon 4th District Representative Angelina “Helen” Tan, M.D. na naisulong ang kanyang stockpiling bill sa panahon na nakaranas ang bansa ng shortage sa medical supplies, at iba pang mahahalagang materyales na magagamit laban sa COVID-19 pandemic.

Anya, kabilang sa mga supplies na kanyang tinutukoy ay ang masks, alcohol, personal protective equipment (PPEs), mechanical ventilators, at RT-PCR test kits at machines.

Sinabi ni Tan na tinutukoy sa panukala ang stockpiling bilang inventory ng health commodites at materials, o physical reserve nito na naka-imbak sa government warehouses o government-owned properties na magagamit sa mga panahon ng emergencies.

Dagdag ni Tan, para ma-operationalize ang naturang polisiya, ay isinusulong ng panukala ang pagbuo ng Health Procurement and Stockpiling Bureau, sa ilalim ng Department of Health.

Ipinunto rin ni Tan na isinusulong nito ang pagbuo ng Medical Stockpiling Fund na susuporta sa National Drug and Device Program na pangungunahan ng DOH para mapanatili at matiyak ang steady na suplay ng critical drugs, vaccines at devices.