Plano ng House of Representatives na gawing prayoridad ang limang natitirang panukala sa legislative agenda ng administrasyon ni Pangulong Rodrigo Duterte, oras na magbalik sesyon ito sa Lunes.
Sinabi ni Speaker Lord Allan Velasco na ang limang natitirang proposed measures ay kabilang sa limang priority bills na itinakda ng Legislative-Executive Development Advisory Council.
Tinukoy ng kongresista mula sa Marinduque ang mga panukala bilang proposed Philippine Virology Institute Act, Center for Disease Control Act, Amendments to the Continuing Professional Development Act of 2016, Bureau of Immigration Modernization ACt, at ang National Housing Development Act.
Bukod diyan ay sinabi ni Velasco na tututukan rin nila ang mga priority measures na babanggitin ni Pangulong Duterte sa huli nitong State of the Nation Address.
Tiniyak ng mambabatas na tutulungan ng Kongreso ang Pangulo na maisakatuparan ang lahat ng pangako nito sa mga Pilipino.