House panel, pormal nang sisimulan ang deliberasyon sa isinusulong na Cha-cha

Sisimulan na ngayong araw ng House Committee on Constitutional Amendments ang kanilang pormal na deliberasyon kaugnay sa panukalang batas para sa Charter Change (Cha-cha) sa kasalukuyang 19th Congress.

Partikular na tatalakayin ng Committee on Constitutional Amendments na pinamumunuan ni Cagayan de Oro City 2nd district Rep. Rufus Rodriguez, ang House Bill (HB) No.6698, o ang proposal na i-constitute ang constitutional convention para amyendahan ang 1987 Philippine Constitution, na inihain ni Manila 6th district Rep. Bienvenido Abante Jr.

Kaugnay nito, nakatakda ring talakayin ang petisyon para sa indirect initiative alinsunod sa Sections 3(B) at 11 ng RA 6735, o kilala bilang Initiative and Referendum Act, para ipasa ng Kongreso ang ‘An Act calling for a constitutional convention’, providing for proportional representation therein and other details relating to the election of delegates to and the holding of the constitutional convention” na inihain naman ng Kapatiran Party (Alliance for the Common Good).

Sa ilalim ng constitutional convention o con-con, nanawagan ito para sa paghalal ng isang delegado mula sa bawat legislative district sa bansa, na silang aatasan na bumuo ng mga posibleng revisions sa 1987 Charter.