MISAKA na ang ihap sa mga pasahero nga miagi sa General Santos City airport, kini ang gibutyag ni airport manager Joel Gavina.
Matud ni Gavina, naa sa 30 hangtud 40 porsyento ang nakita nilang pagsaka sa ihap sa mga pasaherong miagi sa airport karong bulana. Nagsugod ang pagdagsa sa pasahero dihang gisarad-an ang Cotabato Airport sa Datu Odin Sinsuat, Maguindanao tungod sa padayon nga pag-ayo sa runway, ug pipila ka pasilidad sa maong paluparan.
Nahimo usab nga hagit karon ang passenger congestion apan gisiguro ni Gavina nga kaya kining i-manage. Nagdugan usab sila og mga personahe aron magmintina sa mga comfort room lakip mag-assist sa mga pasahero. Kahibaloan nga kapila ka higayon nga gireklamo ang sitwasyon sa pansayan sa palipuran sa GenSan, lakip gireklamo ang igang nga passenger terminal building tungod guba ang mga aircon ug gikulang og mga porters. Apan gipasigarbo ni Gavina nga natubag na nila ang maong mga reklamo. I Richel Gubalani