Ilang lugar sa bayan ng Capalonga isinailalim sa granular lockdown dahil sa mabilis na pagkalat ng COVID- 19

CAPALONGA, CAMARINES NORTE- Isinailalim sa granular lockdown ang ilang lugar sa bayan ng Capalonga, Camarines Norte dahil sa mabilis na pagkalat ng COVID- 19.

Batay sa Executive Order ni Mayor Luz Ricasio, epektibo nitong Miyerkules ay ipinatupad ang granular lockdown sa  Purok 1, 2 at 3 sa Barangay Mataque at Purok 5 naman sa Barangay Poblacion.

Ayon sa Alkalde, mahigpit na ipatutupad sa mga residente ng mga nabanggit na Purok at Barangay ang pagbabawal na lumabas sa kani- kanilang lugar.

Pinag- iingat rin ang lahat ng mga residente hindi lang ng mga apektadong lugar kundi ang lahat ng mga taga Capalonga.

Sa ilalim ng umiiral na panuntunan ang mga Authorized Persons Outside Residence (APOR) lamang ang pinapayagang lumabas ng bahay sa mga lugar na apektado ng lockdown susog sa patakaran ng Inter- Agency Task Force for Emerging Infectious Diseases.

Nauna nang sinabi ni Governor Edgardo Tallado na walang ipapatupad na provincewide lockdown bagkus ang susundin lamang ay ang zoning containment strategy .

Matatandaan na noong Lunes ay nagkaroon ng walong bagong positibong kaso ng sakit sa naturang bayan.

Anim dito ay mula sa Brgy. Mataque habang ang dalawa ay nagmula sa Poblacion at San Roque.

Liban pa ito sa mga naunang kaso noong nagdaang mga araw.