Ilang senador, binatikos ang huling pahayag ng China kaugnay sa WPS

Binatikos ng dalawang senador mula sa oposisyon ang huling pahayag ng China kaugnay sa West Philippine Sea kung saan ay hinimok nito ang mga otoridad ng Pilipinas na tumigil na sa mga maritime exercises nito sa rehiyon.

Sinabi ni Senator Francis Pangilinan na malaya ang Pilipinas na magsagawa ng mga aktibidad sa WPS.

Binigyang diin ng senador na walang business ang China para sabihan ang Pilipinas kung alin mga aktibidad ang pwede o hindi pwedeng gawin sa sarili nating exclusive economic zone.

Samantala, sinabi naman ng nakakulong na si Senator Leila de Lima na dapat ay lumayas ang China mula sa WPS dahil sila ang nambubully sa mga Pilipino at lumalabag sa soberanya ng Pilipinas.

Kasunod nito ay tinawag ng senadora si Pangulong Rodrigo Duterte bilang “duwag” at “pro-China” dahil sa mga huli nitong pahayag tungkol sa isyu sa West Philippine Sea.

Binigyang diin ni de Lima na ang Pangulo ang walang ginawa at nagpakaduwag sa nakalipas na limang taon, ngunit anya, ay nagawa pa rin nito na isisi sa nakaraang administrasyon ang pag-agaw ng China sa ating teritoryo.

Matatandaan na sinabi ng Pangulo na dapat ay sina dating Foreign Affairs Secretary Albert Del Rosario at dating Senior Associate Justice Antonio Carpio ang sisihin ng mga tao matapos maagaw ng China ang ilan sa mga teritoryo ng Pilipinas.

Leave a Reply

Your email address will not be published. Required fields are marked *