Makaluluoy gid ang nadangatan sang isa ka bag-o bun-ag nga lapsag matapos nga ginbilin ini sang iya iloy nga estudyante sa kahilamonan sa may bahin sang Sitio Calumdom, Barangay Tiza, Roxas City.
Sa interview sang Brigada News FM kay Punong Barangay Alfredo Albaladejo, ginpahayag sini nga madamo sang residente nga nakakita nga may isa ka motorsiklo nga naglabay sakay ang isa ka babayi nga naka-uniform kaupod ang driver nga lalaki kag nagsulod sa lugar kun sa diin ginbilin ang lapsag.
Paglipas sang 15 minutos naguwa ang mga ini kag madasig liwat nga nagsakay sa motorsiklo.
Suno pa kay Albaladejo, sang iya gintsekyar ang lugar, nakita niya nga madamo sang dugo kag nagapati siya nga didto ginbun-ag ang lapsag kag ginaalegar gin-utod lang sang kuko ang ambilical cord sini.
Nahibaluan nga nautod gid ang hita kag nabali ang nawala nga tuhod sang lapsag matapos gintaban sang ido kag gindala sa isa ka puluy-an.
Wala naman gintuad ni Albaladejo kun sa diin nga eskwelahan naga-eskwela ang iresponsable nga iloy.
Sa karon, buhi ang lapsag kag padayon nga ginabulong sa isa ka pribado nga ospital. | Judy Ann Juare