Iloy sang PWD student, luyag nga mapanabat ang manunudlo nga nag-bully sa iya anak

Luyag sang iloy sang Person with Disability (PWD) student nga mapanabat ang manunudlo nga ginaalegar nag-bully sa iya anak.

Sa interview sang Brigada News FM kay Nerry Ann Medina Alejandria, iloy ni ‘Lance’, ginpahayag sini nga nagsugod ang indi manami nga pagtrato sang manunudlo nga wala na ginhingadlan, sa iya bata sang Disyembre kun sa diin naglaong si ‘Lance’ nga mapadulong sa CR apang sa baylo nga tugutan ginsiraduhan pa ini sang pertahan rason nga nag-ililihi ang bata sa iya nga short.

Nasundan pa suno diri, matapos nga gindumilian sang manunudlo ang iya bata nga magbakal sa guwa sang eskwelahan bangud luyag sini nga sa iya canteen ini magbakal.

Dugang pa ni Alejandria, gin-akigan man siya amo nga manunudlo bangud nagpamunyag siya sang tanom sa eskwelahan, sa diin ginsilingan siya sang maestra nga wala ka kahibalo mataas na di amon bill sa kuryente kag gauyang kalang sa tubig.

Ginpakamaayo na lang ni Alejandria nga indi na ini pagsapakon bangud indi sini luyag sang gamo apang wala na niya napunggan ang kaakig sang ginapahayag nagsugid sa iya ang classmate sang iya bata nga sa bug-os nga klase si ‘Lance’ lang ang wala ginhatagan sang module.

Sa karon, nagdangup na ang mag-iloy sa Municipal Social Welfare Development Office (MSWDO) sang Sapian agud mahibaluan ang nagakadapat nga himuon sa natabo.

Desidido ang iloy nga mapanabat ang manunudlo sa ginapanghimo sa iya bata.

Samtang, nagpamalibad naman nga maghatag sang pahayag ang nasambit nga buluthoan. | Judy Ann Juare