NAGPADAYON pa ang imbestigasyon sa Fatima Police station kalabutan sa pinaka-ulahing insidente sa pagpamusil kung asa magtiayon ang nahimong biktima ug usa ang nakabsan og kinabuhi.
Una nang giila sa kapulisan ang mga biktima mao silang Belgar Tajala, ug ang namatay mao si Amelia Tajala, mga hamtong ang panuigon, negosyante, ug nagpuyo sa Purok 5, Block 7, Barangay Fatima.
Sila ang gipaulanan og bala sa mga armadong tawo nga sakay sa usa ka motorsiklo dihang padulong na unta sila sa trabahoan.
Sa kasamtangan padayong nagpaalim sa ospital ang bana nga si Belgar tungod sa mga samad pinusilan nga naangkon niini sa lawas human gipusil sa armadong tawo gamit ang kalibre 45 nga armas sa SACI Road, Zone 1, Barangay Fatima.
Wala pa matumbok sa otoridad kung unsa ang motibo sa pagpamusil dungan sa gilusad nga imbestigasyon ug naghulat sila sa mga dugang impormasyon gikan sa pamilya nga kasamtangang naa sa kasubo nga kahimtang. I Enamie Mogpon