Wala natulugan sa tuman ka baho ang mga residente sa Barangay Bolo, Roxas City matapos nga gin-ulaan sang isa ka truck nga higko gikan sa posonegro ang ila drainage sa lugar rason nga nagreklamo ang mga ini sa ila Barangay Kapitan.
Sa interview sang Brigada News FM Roxas City kay Siolly Andrade, Barangay Kapitan sang Bolo, iya ginpahayag nga alas 5 kaina sang aga, ginpukaw siya sang mga residente agud pahibaluon nga wala ang mga ini natulugan bangud sa tuman kabaho nga ila nasimhutan.
Sa pagtsekyar ni Andrade, didto nila nakita nga madamo sang higko kag nagailig sa creek kun sa diin nagpunong ini rason sang pagpanimaho.
Dugang pa sini, nga ginpang-evacuate sang pila ka mga pumuluyo ang ila mga kabataan bangud indi makapanginaon kag indi makasarang sa baho.
Ginpahayag ni Andrade nga may nakakita sa isa ka closed van ang nag-ula kag nagbalik sa City proper, apang indi pa nila matumod kun ano ang plate number sang salakyan kag kun sino ang may kahimuan sini.
Gilayon man ini nga nagpangayo sang bulig sa BFP Roxas City agud ipa-drain ang nasambit nga higko.
Nagapanawagan man si Andrade sa may kahimuan sini nga kuntani indi na maliwat ang kasubong sini nga hitabo bangud iya mga pumuluyo ang naga-antos. | Judy Ann Juare