Julian Felipe Reef, hindi nakapaloob sa EEZ ng Pilipinas ayon sa Palasyo

Inihayag ni Presidential Spokesperson Harry Roque na hindi nakapaloob sa exclusive economic zone ng Pilipinas ang Julian Felipe Reef.

Iba ito sa pusisyon ng Department of National Defense at Department of Foreign Affairs na naghain ng diplomatic protest laban sa China dahil daan-daang mga barko nito na pumarada Julian Felipe Reef.

Sinabi ni Roque na ang mga kritiko lamang ang nagpapalaki sa isyu para lamang sirain ang pakikipagmabutihan ni Pangulong Rodrigo Duterte sa China.

Sa katunayan anya, ang National Task Force on the West Philippine Sea (NTF-WPS) ang unang umalma sa presensya ng mga barko, na kalaunan ay sinuportahan ni Defense Secretary Delfin Lorenzana.

Kaugnay nito ay itinanggi naman ni Roque na humina ang pusisyon ng Pilipinas ng Julian Felipe Reef dahil sa kanyang mga pahayag.

Iginiit ni Roque na meron presidential decree na inilabas noon si dating pangulong Ferdinand marcos na nagpapatibay sa claim ng Pilipinas sa Julian Felipe, kahit nasa labas ito ng EEZ ng Pilipinas.

Ipinunto rin ni Roque na kahit kailan ay hindi kontrolado ng Pilipinas ang Julian Felipe Reef at ang China at Vietnam naman talaga ang nakikipag-aagawan sa naturang teritoryo.

Matatandaan na sinabi ni dating Supreme Court senior associate justice Antonio Carpio na nasa loob ng 12 nautical miles ng Grierson Reef ang Julian Felipe Reef.

Ang Grierson Reef, na isang high tide feature na inookupahan ng Vietnam, ay kine-claim ng Pilipinas sa ilalim ng RA 9522, bilang bahagi ng Kalayaan Island Group.

Leave a Reply

Your email address will not be published. Required fields are marked *