-Reymund Titong
KABANKALAN CITY, Negros Occidental — Ginhanas ang 30 tanan ka mga mangunguma kag barangay health workers (BHWs) sa syudad sang Kabankalan sang paghimo sang pandesal kag avocado ice cream, agud e-diversify ang ila palangabuhian.
Ang ini nga inisyatibo ang ginpangunahan sang opisina sang Gender and Development (GAD), Office of the Extension Service kag College of Business and Management (CBM) sang Central Philippines State University (CPSU).
Pahayag ni Professor Sheila Ignacio, dean sang CBM, ang ila paghanas sa mga mangunguma ang makabulig sa pagpadugang sa ila mga mangabu-an, ilabi na sa tion sang “tiempo muerto” ukon tigkiriwi, sa diin limitado ang ulubrahon sa uma.
Dugang pa ni Ignacio nga ang ginahanas nga mga butang sa mga mangunguma ang research-based ukon nag-agi sa malawig nga pagpanalawsaw nga gina-transfer sa mga assosasyon, bilang extension program sang unibersidad.
Sa piyak nga bahin, suno kay GAD director Professor Sherly Calugcugan, iya ginpahayag nga ang paghatag serbisyo sa guwa sang unibersidad ang isa man nga nakasulod sa 10-point policy agenda sang universidad.
Ginasigahum ni Calugcugan nga malab-ot ang halos tanan nga mga asosasyon sa syudad kag ka-iping nga mga lugar, agud mabuligan man pasanyog sang ila mga ihibalo.*