NAGSUGOD pa lang sa pagbutang og ‘Kadiwa’ store sa Soccksargen region, asa naa pa lang sa pipila ka munisipyo ang natukoran niini.
Kini ang pagpaklaro ni Dr. John Pascual, regional executive director sa Department of Agriculture (DA) 12, dungan sa komento sa daghang rwsidente sa rehiyon nga wala nila nakita ang ‘Kadiwa’ store. Matud ni Pascual, kasamtangan dunay mga Kadiwa store sa pipila ka munisipyo sa Cotabato ug Sultan Kudarat Province.
Apan sa pagkabalo niini tungod bag-o pa siya milingkod sa pwesto, wala pay ‘store’ sa Kadiwa sa GenSan ug probinsiya sa Sarangani. Dugang ni Pascual, naa sa 20 hangtud 30 porsyento ang kabarato sa mga ‘agriculture’ product ang ginabaligya sa store tandi sa mga palengke. Mokabat usab sa 20 hangtud 30 ka store ang punting nilang mabutang sa mga munisipyo sa tibuok rehiyon.
Ang Kadiwa program, ang tubag sumala pa sa Pangulong Ferdinand Marcos Jr., aron makapalit og presko ug barato nga agricultural ug fishery products ang mga residente. Sa taho sa pangulo atol sa ikaduhang State of the National Address (SONA) nakabenepisyo ang naa sa 1.8 pamilyong Pilipino gikan sa 7,000 Kadiwa stores nationwide. I Richel Gubalani