Kapartner it Aklan Local Government nga crematorium temporaryo nga nagsara

Gin-anunsiyo it Gegato Abecia Funeral Homes & Crematory nga ipanaba nanda sa pueo ka mga bangkay kada adlaw ro andang i-cremate bangud masyado eun nga naga-init ro makina.

Base pa sa tag-ana it nasambitan nga Crematorium nga si Fely Gegato, ro mga nabilin nga mga bangkay hay pagatapuson eang nga i-cremate ag temporaryo anay nga ipundo ro andang operasyon.

Ro Gegato Abecia Funeral Homes & Crematory hay kapartner it lokal nga gobyerno it Aklan sa tama nga pagdispose it mga bangkay it tawo nga kumpirmadong namatay bangud sa COVID-19.

Base pa kay Gegato, nagbuoe eun sanda it sambilog pa nga cremation machine nga kaya mag-cremate it 100 nga mga eawas sa sambilog ka adlaw pero uwa man nana ginpahayag kung hin-uno buksan uman ro crematorium.

Bangud dikara, ginsugo ni Governor Florencio Miraflores ro tanan nga mga alkalde sa Aklan nga magpahaom it lugar kung siin pwede i-eubong ro mga namatay bangud sa COVID-19.

Base man kay Dr. Bong Cornelio Cuachon, head it Provincial Health Office, kinahanglan it lokal nga gobyerno it sambilog ka maid-id nga pag-istudyo sa kung paano ro tama nga pag-eubong o pagdispose it mga patay nga eawas agud maiwasan ro kontaminasyon.

Sa presente, may 184 nga kumpirmadong namatay ro Aklan bangud sa Covid19./JIL B. LACSON