Kapin 2-milyon ka pesos nga balor sa ilegal nga drugas, nasakmit sa mga otoridad

KANANGA, LEYTE- Duha ka High Value Individual sa Kananga Municipal Police Station ang nasikop sa gipahigayon nga buy-bust operation sa hiniusa nga pwersa sa PNP Drug Enforcement Group- Special Operations Units 8, 1st Leyte Provincial Mobile Force Company, Kananga MPS, kaubang ang PDEA 8. Nahitabo ang nahisgutang operasyon Martes sa gabii, didto sa Upper Poblacion Brgy Hiluctogan sa lungsod sa Kananga.

Sa nahisgutang operasyon, wa na kapalag ang mga suspek nga sila si Voltaire Adorza Recta, 36-anyos, ug Ruel Petogo Brase, 42-anyos, pulos walay trabaho ug parehong residente sa barangay Poblacion sa nahisgutang lungsod.

Sa kantidad nga Php 1,000 nga gigamit nga buy bust money, ang nagpakaaron-ingnong buyer nipalit kang Recta og usa ka medium-sized heat sealed transparent plastic sachet sa gituohang shabu.

Gawas sa ubang ebidensiya nga nasakmit sa mga otoridad, ang mga nasakmit nga gituohang shabu gibana-banang may timbang nga 300 gramos ug adunay gibana-banang street value nga kapin sa 2 ka milyon ka pesos.

Nasayran nga kasong pagsupak sa Section 5 ug 11 sa Article II sa R.A 9165 ang atubangon sa mga suspetsado.