KINATIBUK-ANG P28,800,000.00 kantidad sa ismagul nga sigarilyo ang nakumpiska sa mga otoridad alas-6:00 kagahapon sa buntag, Setyembre 25, 2023 sa Minterbro Wharf, Brgy. Ilang, ning syudad sa Davao.
Malampuson nga nadakpan sa mga sakop sa Task Force Davao, Davao City Police Office inabagan sa Bureau of Customs XI (BOC XI) ang maong nagdala sa mukabat sa 1,152 ka mga kahon sa gidudahang nagkadaiyang matang sa sigarilyo nga sila Adzkel M Omar, 40, Abdul Rajik S Alamansa, 69, Aramil K Rahamban, 38, Faisal S Ilahan, 20, Mahmud A Salapudin, 31, Allan H Julabi, 51, Abdulnayan D Aidan, 33, Aljunib H Sapairen, 30, Daniel B Tucop, 69, Abdil Halim B Patarasa, 61, nga puros nanimuyo sa probinsiya sa Basilan, Dionisio S Salazar, 53, residente sa Betally , Zamboanga City; ug Jedyd l Waradje, 19, ug residente sa Block 2, Brgyy Ilang, Davao City.
Sakay ang mga nahisgutan sa usa ka Pumboat nga midunggo sa Minterbro Wharf, Brgy Ilang, ning syudad.
Samtang, mapasalamaton si Task Force Davao Commander Colonel Darren E. Comia sa mga dabawenyo, sa suporta ug kooperasyon ilabina sa pagpatuman sa “pag may nakita, dapat magsalita” nga Culture of Security campaign sa Davao City.
Nahimong posible sumala pa ang pagkakumpiska sa mga kontrabando human nga usa ka concerned citizen ang mihatag og impormasyon sa presensiya sa motorized nga Bangka sa maong lugar.
Kasamtangan, gikustodiya na sa BOC XI ang mga suspek ingon man mga kontrabando alang sa pagpasaka og kasong kalapasan sa RA 4712 sa Tariff and Customs Code of The Philippines.