Nasapwan nga yara na sa state of decomposition ang bangkay ni Ricky Boy Barredo, kapitan sang baroto nga naigo sang kilat samtang yara sa tunga sang lawod sang tinalikdan nga Biyernes, Setyembre 15.
Nahibaluan nga isa ka mangingisda ang nakasapo sa bangkay sang biktima nga nagakayaon kag nagahabok na ang lawas sa higad sang baybay sa Sitio Pook, Brgy. Culasi, Roxas City kag gilayon nga gin-report sa ila barangay.
Nagahilibion nga ginkilala sang himata sini ang amo nga bangkay pinaagi sa suksok nga panapton.
Sa interview sang Brigada News FM kay Rick Barredo, amay sang biktima, iya ginpahayag nga nagpangabay ini sa punerarya nga kun mahimo pangitaan sang paagi nga indi magpanimaho ang bangkay bangud ila pa ihamyang sang tatlo ka adlaw sa ila balay agud ila man ini makaupod antes ilubong.
Matandaan nga diutayan lang matuntuhan ang pamilya Barredo matapos may nagpanawag sa ila nga nagapangayo sang P5,000 tubtob P10,000 kabaylo sang pagdul-ong nila kay Ricky Boy bangud ila ini nasapwan.
Sa karon, ang pamilya ang nagapanawagan gid sang bulig para sa pagpalubong sa bangkay ni Ricky boy. | Judy ann Juare