Kapitan sang Brgy. 7, gin-athag ang rason kun ngaman wala naka-avail sang housing unit ang pila ka pamilya nga nasunogan

Naghatag sang paathag si Barangay Kapitan Nilo Diestro sang Brgy. 7, Roxas City kun ngaman may pila ka pamilya nga wala naka-avail sang housing unit sa Tanza Ville.

Sa interview sang Brigada News FM Roxas kay Kapitan Diestro, iya ginpahayag nga ang mga nagalumon nga pamilya ang wala nalakip sa listahan nga mahatagan sang unit bangud ang gina-isip lamang amo ang tag-iya sang balay.

Dugang pa sang Kapitan, City Engineer’s kag DSWD ang nag-profiling kag nag-validate sang listahan gani wala na siya sang mahimo.

Nahibaluan nga sa 103 ka pamilya nga apektado sang sunog, 96 lamang diri ang na-awardan sang housing unit.

Nagpangabay man si Diestro sa mga pamilya nga wala natagaan sang balay nga indi siya paglainan sang buot bangud indi siya ang awtorisado nga magpanglista kag suno diri kun siya lamanng ang pagustuhan makabaton gid ang tanan nga nabiktima sang sunog. | Judy Ann Juare